ನಾನು ರೋಗಿಯಲ್ಲ, ಆದರೂ

ನಾನು ರೋಗಿಯಲ್ಲ
ಆದರೂ ನರಳುತ್ತೇನೆ ರೋಗಿಯ ಹಾಗೆ

ಮೈ ಮುಟ್ಟಿ ಡಾಕುಟರು
ಇರುಬು ಕಚ್ಚಿದಂತೆ ಸೂಜಿ ಚುಚ್ಚಿ
ಕೊಡದಿದ್ದಾಗ ಗುಡ್ಡೆ ಗುಡ್ಡೆ ಪಿಲ್ಸು

ಮನೆಮಂದಿ ನನ್ನ ಮಲಗಿಸಿ
ಬಿಸಿನೀರು ಹಾಲು ಬ್ರೆಡ್ಡು ಗಂಜಿ ಪಿಲ್ಸು
ಕುಡಿಸದಿದ್ದಾಗ ಕಾಲಕಾಲಕ್ಕೆ ನಿಗಾವಹಿಸಿ

ಹೋಗದಿದ್ದರೂ ಕೆಲಸಕ್ಕೆ
ಜೊತೆ ಕೆಲಸಗಾರರು ಸಂಜೆ ಮನೆಗೆ ಬಂದು
ವಿಚಾರಿಸಿಕೊಂಡು ಹೋಗದಿದ್ದಾಗ

ಅಕ್ಕಪಕ್ಕದ ಜನ ಕಿಟಕಿ ಬಾಗಿಲಲ್ಲಿಣುಕಿ
ಲೊಚಗುಟ್ಟಿ ಪಾಪ ಏನಾಯ್ತೆಂದು
ತೋರದಿದ್ದಾಗ ಒಣ ಕರುಣೆ

ಪಡುವಣದ ಪಡಖಾನೆಯಲ್ಲಿ ಸೂರ್ಯ
ಕೆಂಪೇರಿ ಹಿಂಬೆಳಗು ಚೆಲ್ಲದಿದ್ದಾಗ
ನರಳುತ್ತೇನೆ ನಾನೂ ಒಬ್ಬ ರೋಗಿಯ ಹಾಗೆ.
#  #


ಕಳೆದ ಒಂದೆರಡು ವರುಷಗಳ ಹಿಂದೆ ಇದನ್ನು ಬರೆದ ನೆನಪು. ತಾನು ನಂಬದೆ ಪರರನ್ನು ನಂಬಿಸುವ ಮತ ಜಾತಿ ಮನಸ್ಥಿತಿಯ ಭಾರತೀಯ ಸ್ವಭಾವಕ್ಕಿದು ಅಲಂಕಾರ ತೊಟ್ಟು ನಿಂತಂತೆ ನನಗೀಚೆಗೆ ಅನುಭವವಾಗತೊಡಗಿ ನಿಮ್ಮ ಮುಂದಿರಿಸುತ್ತಿದ್ದೇನೆ.